Do hänn mir scho erscht mol könne erläbe dass, wenn me fründlig isch und sich früehzitig ahmäldet , mir ohni langi Wartezyt hänn könne in d Schleuse fahre und uffschtyge  bis zum Stausee vo Birsfälde.

By dere Glägeheit möchti au no sage, dass mir alli 4 mol Schleuse genau so problemlos hänn dörfe erläbe.

Nach der erschte Etappe (Bis Augscht) verby an de Weidlig vom Wasserfahrverein Muttenz und nach dr 2. Schleuse sinn mir langsam an unser Usflugszyl ahkho. Damit d Personeschiffahrt unser Langschiff nit gege s Ufer schubbfe kha, hett ein vo de jüngere Seniore d’Schue und d’Sogge abzoge und hett mit eme lange Seili s Heck vo unserem Langschiff amene Pfoschte g’sicheret. Nochhär sinn mer in Rhyfälde in ere Gartewirtschaft an reservierte Tisch gsässe, hänn dört zum Teil usere 2 sytige Pizza-Uswahl unseri Zwüscheverpflägig usgsuecht und mit eme küehle Bier unsere Durscht könne lösche. Wäge däm küehle Bier wär als Stürmaa die 0.0 Promille-Gränze ganz lycht überschritte worde und dorum isch als Ersatz-Schtürmaa dr Alex mit em Zug zue uns kho und hett d Rückfahrt problemlos g’meischteret.

Bym Depot unde sinn mer denn no kurz in dr Klause abgsässe und hänn uns nomol könne freue über dä bsunders schöni Tag.

Uebrigens : wo ni dehaim in Spiegel gluegt ha, ha ni gmeint i stand vor ere rote Lampe, bis i gmerggt ha, dass 5 Stund uff em Rhy ohni Kappe und ohni Sunnecréme doch lang gnueg isch für e glaine Sunnebrand. Das isch aber mit Abstand s’einzig glaine Negative gsy an däm tolle Tag.

Danggschön liebe Cello ( Walti Eglisee )